我的第一次-整乾鮑

煮野食，確係令我放鬆不少，見到心愛既家人食得開心，自己就有最大既滿足。
近月整左數次鮮鮑魚，覺得唔錯，咁巧合，在網上見到有人post整乾鮑魚，睇到自己都心郁郁，知道整乾飽唔易，但又想試，終於，的起心肝，去買左D乾鮑返屋企，準備一試。

第一次入手既南非乾鮑

由於第一次整乾鮑，選擇左較化算既南非乾鮑，先試牛刀，加油！

2月9日，開動，第一步:發水
乾鮑魚: 8隻

發水前

首先，預備一個容器，用來浸發乾鮑，記住要預留空間比乾鮑發大，所以選擇容器都有一定的限制架。

加入清水浸過乾鮑

好喇，今日就係咁多，明天第二步，換水。

2月11日

發水兩天後的乾飽

發左兩日水，我既乾飽長大左，當然，這兩天係要換水既，等今晚，到整乾飽第三步，期待。

話咁就到左夜晚，將已發水既乾飽，拿出來刷洗干淨，換入飲用水，剛蓋話飽魚約一吋，大火煲滾後關爐待自然放涼（記得唔駛打開蓋攪佢地），放涼後放回雪櫃待一天左右（兩天更佳）又到下一步喇。

2月12日

經過四天前期準備，今日開始進入新階段了。為左今天尼個步驟，走左街市一趟，買左隻雞、雞腳同埋排骨，買尼D野，冇錯，係進入炆鮑魚既步驟了，心情真係有D興奮。

回家後，首先將所有材料洗淨，瀝乾水，記住全部材料都唔駛醃。先將排骨煎香備用，雞腳同埋雞飛水。

之後，按步就班玩層層疊喇。煲底先放上煲底墊，第一層放入煎香既排骨同埋雞腳，之後放上鮑魚，最上層放上大塊雞件，最後將浸鮑魚既水加入，水位高度需要蓋過鮑魚架，之後大火煲滾，轉細火煲4至5小時後關爐放涼。

鮑魚層層疊圖

2月13日

由昨日開始炆鮑魚起，至今晚已大約斷斷續續炆左13個鐘，計一計算，明晚應該具條件食喇，今日既步驟只係留意炆緊既鮑魚，唔好比佢乾水。明天繼續努力，美味既鮑魚就快有得食喇。

 炆鮑魚中，香味滿屋

2月14日

一早起身第一件事，開爐繼續炆鮑魚，夾夾埋埋，合指一算，炆左18個鐘，之後將鮑魚取出來放涼，目的當然係要炆好既鮑魚回糖啦，放涼左大約個半鐘，睇住D鮑魚果然變深色左，Magic, 跟住就到食前既最後步驟喇，用炆鮑魚既鮑魚汁（所有材料取走、隔渣同埋盡量去油），加入煲內煮熱，之後調味（頭抽、蠔油同埋麥牙糖，份量因個人喜好略作加減），調到合你心意既味道後加入回糖既鮑魚，同埋你喜歡既其他食材，炆熱後，少少生粉水加入做芡，最後上碟趁熱食。

 我既製成品，第一次乾鮑之旅成功！