2017三代同堂新年親子韓遊

今年新年，決定一家大細出外玩玩，帶埋父母、兩子，來個三代同堂新年親子韓遊，攜老帶幼在零度以下旅遊，出發前都考慮很久，但考慮到一家人就是開心，覺得幾辛苦都冇所謂，見到大家開心就好，於是決定出遊，最緊要安排好，做好功課就OK。

出發前，好多人說韓國冇啖好食，D食物唔適合老人小朋友口味，但今趟旅行後，覺得又唔係BOR，每餐大家都食到飽晒肚，兩老都覺得食物OK。

1月30日（年初三）

今DAY出發了，澳門至首爾，其實在澳門都可以飛，但無奈時間唔靚，要零晨機，擔心兩老兩幼辛苦，選擇在香港飛，其實都唔太辛苦的，今日係下午15:30香港至首爾機，所以早上11:30船由澳門至香港機場，抵達機場後，唔多人，用左15分鐘完成Check-in及退稅，有充裕的時間在機場內午餐及休息，到左15:30準時登機啟航，今轉是乘坐Korean Air，原本諗住同其他航空公司都差唔多，點知有驚喜，乘務人員除了很有禮貌之外，飛機餐質素也不錯，我是首次搭機可以完全消化晒個飛機餐的，在機上食下、Hea下，約韓國時間晚上8點多抵達仁川機場，由於早已訂了酒店的機場接送服務（攜老帶幼當然一切妥善安排），所以可以舒舒服服去酒店，今次住的酒店是 S.A. Seoul Apartment，感覺唔錯，方便性價比高，Check-in後，大家分別入房休息，我就到樓下Mini Store買D宵夜，順便攪掂埋大家的T-money卡，方便後幾日在交通上使用，第一日行程基本上交通為主，但還好預了1充足的時間及安排，大家都沒有累的感覺。

酒店S.A. Seoul Apartment

網址：www.saseoul.com
地點：超級方便，在首爾站對面，步行至首爾站約3分鐘內，只需過一條斑馬線，附件有便利店、食店，對面更有Lotte Outlet及Lotte Mart，買完東西方便回房。
交通：首爾站集合了1號線及4號線的交接點，亦有機場快線，去明洞僅2站，東大門4個站，去弘大搭機場快線都好似1至2個站到，超級方便。
其他：今次訂了兩間4人複式房間，面前較大，內有煮食爐洗衣機等，每晚折合港幣9XX，我就覺得好符合經濟效益喇。

1月31日（年初四）

今日行程都唔會多，攜老帶幼的行程大家都知道，舒適為主，早上買早餐回Apartment享用，早餐是過對面首爾站內買，好好味的早餐，吃過後去轉洗手間。

出發，第一站去弘大Trick-eye 3D 館，出到弘大站，轉向主要的購物街，Trick-eye 3D 館就是街道中位置，外觀並不起眼，但是也算是不難找，之前在網上訂了折扣券，憑券取門票後就OK了，門票包括有Trick-eye 3D 館及冰雪館的，3D館的行程當然是不停在影相啦，黎到3D館，絕對是浚浚Oppa的天下，可以完完全全發揮佢愛扮野既能力，比100,000個讚，兩老都玩得好開心，都係不停在影相，嫲嫲的活力更是沒法擋，欣賞下大家既靚相先！

接著過去冰雪館，記得著反大褸、帶頸巾手套冷帽啊！入內係幾凍的，因為全部東西都係冰造的，濕凍下都幾凍，但小朋友入內好像唔怕凍既，玩了無數次的冰滑梯、入冰屋、坐冰廁所等，小朋友在玩的時候既小宇宙果然勁，冰雪館唔係好大，連玩半小時可完成，出來冰雪館後在外面即時唔覺好冷。

冰雪館後又到醫肚既時間，帶大家食下地道野先，找了間烤肉店食，食物質素唔錯，老老幼幼都食到好開胃，飽著肚子出來，尼餐都唔係好貴，大約Won$50,000.00，可以食飽4大2小，都OK，食完午餐都未夠20分鐘，兩嫲孫又來個甜品喇，都好！食得是福！

在弘大逛了會，來到第二站 – 明洞，來首爾玩既、買野既，基本都會來明洞，來到明洞，第一件事就去左Hi 個 Tea，不過由於仍飽，只係飲下野，兩老同兩少坐低飲下野，食下小食，我同老婆就去大使館兌錢，嘩！今日Rate靚，一次過兌了約Won$1,500,000.00，唔駛日後再兌。

兌換錢後，嘆杯飲料，繼續行程，由於明洞同弘大都係Shopping點為主，要行唔少路，怕兩老會累，就先安排兩老來過韓式足按，我地就繼續行街街之後接兩老，行了一會，歷史重演，細仔開始眼瞓，爸爸強壯臂彎又要出動，真係幾攰，抱左個半鐘多D，手臂真係有想斷的感覺；而今晚決定買明洞的街頭地道野會Apartment再叫炸雞食，太正了，都係那句，來韓國食外賣炸雞係常識啊！

2月1日（年初五）

今日行程，小朋友為主，點知原來活躍既嫲嫲都適合，就是樂天世界 Lotte Adventure World，由首爾站乘1號線坐1個站至市廳站，轉2號線坐16個站至蠶室站就到了（總車程約35-40分鐘），由於都係網上訂了折扣券，憑券取票，入到場內，未玩前兩兄弟先興奮，接著全日既行程就係玩、玩、食、玩、玩，來到樂園就係這樣，今次主要玩室內館為主，下次再去玩室外先得，在場內，很多遊戲都有高度限制，由於桓桓豬弟弟長得高，雖然剛4歲，但係好多野都高度剛剛pass可以玩，豬弟弟都玩左7至8樣野，浚哥哥再玩多D，而且仲有時間夾下公仔（兩個仔至愛玩意之一），大約到黃昏6點多才回首爾站。

回站後晚餐在S.A. Seoul Apartment旁邊的元祖薯仔豬骨湯店食飯，好好味，諗起又想食了，在薯仔豬骨煲內（微辣的），加入年糕、麵、餃子一齊食，更正，除了個煲，還點了泡菜牛肉湯（老爸至愛）等，吃到大滿足後回Apartment休息。

2月2日（年初六）

今日行程要早起床，因book了1 DAY TOUR去玩雪同埋摘士多啤梨，早上要8點到明洞附近新世紀酒店外集合，今次1 DAY TOUR跟了韓國星程旅遊Starway Travel，Starway既行程安排算唔錯，導遊都OK的，值得推介。

準時到了集合點，報到後上車食Starway安排好的早餐，第一行程點就是去餵綿羊及聖誕老人村，大約一小時車程，抵達目的地，浚浚哥哥首先興奮，因為第一次親身接觸雪，感覺新鮮，細佬就慢熱點，沿住雪路上到餵綿羊的地方，哥哥第一時間即去餵小動物，細佬經warm-up後終於開動了，一開動就興奮心情隨之而來，餵過綿羊、白免後，兩兄弟對住咁多雪，點會只是欣賞觀看，玩過不停，我也感到他們的開心，心也在想，現在的小孩也實在太幸福了，玩了30分鐘雪，只餘下不夠20分鐘時間去參觀聖誕老人村，所以都只是走馬看燈，拍拍照就算了，開心最重要。

第二站，車程約30分鐘，去午餐，是韓國地道藥膳雞煲，我們一家六口，共有兩大煲，絕對足夠，而且尼個藥膳雞煲的食法是，先食雞件，餘下湯汁加入糯米飯煮成雞粥，又別豎一番風味，一句說話，好食。

第三站，車程約40分鐘，到玩雪兜場，當然小朋友就繼續興奮，玩了幾轉雪兜後，大小朋友都將焦點轉去玩雪之上，只是玩雪都玩了差不多一個小時，興奮不已，就算瞓晒在雪地上，亦不感寒意，都是那句，開心就好了。

第四站，車程約30分鐘，到達士多啤梨農場，除了可邊摘邊食外，每人還可帶回一盒士多啤梨及DIY無添加的士多啤梨果醬，我們六人就不得了，只是帶走的6盒士多啤梨已夠利害，3日內食了平時一年份量的士多啤梨，農場內大小朋友可以一嘗親摘士多啤梨的樂趣，自己挑選自己採摘，很有樂趣，其後更可DIY自製果醬，感覺新鮮，今次兩兄弟都分別自己親手做了一瓶果醬，不得了。

1 DAY TOUR完滿結束，返回首爾站內先去Lotte Outlet食野，之後一齊行左Lotte Mart，都買左唔少野，嫲嫲是大嬴家，仲有即時退稅，超方便，我們這一家仲係Lotte Mart到買了兩隻醬油蟹（一辣一唔辣）回Apartment享用，再加埋當日即摘的士多啤梨，Good晒，超滿足。

2月3日（年初七人日）

原定今日早上去福壽宮，下午比時間大家Shopping下，但怕大家都累，所以早上比大家睡多一點，早上11點才出發去午餐，取消福壽宮的觀光行程，直接去明洞吃及買，團中兩位女士都要買護膚品，所以明洞都係首選，來到明洞，首先食午餐，去了School Food食午餐，又食韓式冷麵、部隊鍋飯、鐵板豬排飯等，好好味！

飯後當然是女士們的時間，男士當然幫忙拿東西，大家買左要買既護膚品後，去左Big Mart買了些手信食品，大約到下午4點半，回Apartment放下東西、執下野、休息下先去晚餐，今晚終於不是韓食了，去食了德國料理，味道唔錯，也食得飽飽的，唔知道是否因為身處韓國，份海鮮都有放辣去煮的，可能是為了適合韓國人的口味，食過晚餐回去休息了，因下一天要回程了。

2月4日（年初八）

早上起來食過早餐，今日是13:45機回香港，因怕機場太多人CHECK-IN又怕地勤人員慢，所以早點9:30乘坐機S.A. Seoul Apartment安排的機場包車服務去機場，預留足夠的時間，去到機場，搵到CHECK-IN COUNTER，地勤人員說你們6個人，可以用Group Check-in counter，非常好，去到只需等候前面兩人，完成Check-in 寄埋行李約用左20分鐘多一些，亦由於我們隨行有6歲以下小朋友，所以又可以用機場的Fast Track服務，安檢過關5分鐘完成，很順利，讚！還有時間可以讓我們買下野、逛下、舒服地坐底食午餐後才登機。

飛機上飛機餐照樣美味，還有餐後甜品cheese cake ice-cream，一絕，都是整份食晒，回到香港，時間是17:10分，機場至澳門船剛開了，下班機場船要22:00，無理由等太久，又唔想大家辛苦，所以用了尊豪PLUS的服務，舒舒服服的專人提取行李、專車出碼頭、專有通道上船、船上嘆份豐富的餐點後、專車送回家中，太舒服了，完全沒有攰的感覺，所以同老婆相量了，下次在香港飛，回程都係尊豪PLUS好D。

行程完滿，舒舒服服的返到屋企，真的期待下一次台中清境之旅。