2015聖誕前夕親子玩轉台南與高雄

2015聖誕前夕親子玩轉台南與高雄

回歸假期加上冬至，再拼上星期六、日，剛好四天假期，又係出走既時候，時間唔多，唯有近近走一轉台南及高雄，我地一家四口（兩個小朋友一個6歲、一個快3歲）連同朋友一家三口一齊出走。

12月18日（星期五） - 出發
晚21:20機由澳門至高雄，約1小時既行程好快抵達，直上的士直達第一晚酒店 – 高雄米朵花園酒店，酒店鄰近新堀江商圈，係鐘意SHOPPING人士既唔錯選擇之一，而酒店佈置都唔錯架，都有特式，還記得升降機門一開時，我地大家都「嘩」左一聲，由於我地入到酒店已經11點幾，取房後快D休息，今次訂左四人房，空間闊落點，住得舒服點（其實尼個行程我地一家四口每晚酒店都係訂左四人房，我同老婆一人孖一件瞓）。

12月19日（星期六） - 行程第一天

兩兄弟大約七點半左右醒左，攪好梳洗後，去5樓餐廳食早餐，適逢天氣唔錯，又唔凍，我地選左露天花園位置享用早餐（其實湊住兩個細既，仲係男仔添，邊有得慢慢享用）兩set西式兩set中式，味道唔錯，幾好味，美中不足就係冇即磨咖啡，只有即沖咖啡，所以有少少遺憾（晨早冇左杯啡係差咁D）。

高雄米朵花園酒店

地　　點：＊＊＊＊＊ (鄰近SHOPPING熱點，唔愁買同埋食)
交　　通：＊＊＊＊＊ (附近有捷運站，的士亦容易叫到)
乾 淨 度：＊＊＊＊
房內設施：＊＊＊ (一般酒店房內應有既都有)
早　　餐：＊＊＊＊ (雖然唔係自助餐，但有中西式兩款選擇，味道唔錯)

早餐後 check out，訂好既七人大車亦來到酒店門口，一車七人直衝台南，第一站台南奇美善化農場，但小插曲出現左喇，去到奇美善化農場附近私機搵來搵去都搵唔到，最後黃天不負有心人，終於搵到，但是………….，農場已經搬左，點算，唯有先去第二行程 - 天文館，去天文館沿途見到菠蘿田，順便落車影幅相，司機大佬好好人，我地去天文館時佢幫我地搵第二個農場，真係唔話得。

台南南瀛天文園區
其實話大唔大，話細唔細，抵達入館前，先係館外草地比小朋友晒晒太陽，走走跳跳，係澳門真係難搵尼Ｄ空氣咁好既地方，買票入館，入場費唔係好貴，館內設施唔算多，但都好適合小朋友睇，其實館內可以大約逗留到一小時至一個半小時的，館內主要介紹太陽系內既野，哥哥比較喜歡睇，較有興趣，細佬就膽小，怕黑，成個行程幾乎有一半時間以上係要我地抱住，館內亦有少少遊樂設施及模擬景象自拍設施，對小朋友來說，有遊樂設施就ＯＫ了，參觀完館後，大家都肚餓了，去左天文館既餐廳，食埋Lunch至去下一個景點。

Lunch後，司機哥哥真係好好人，幫我地搵到天文館附近另外一個農場去玩，就係走馬瀨農場，真係感恩，立即出發。

 

台南南瀛天文園區
交　　通：＊＊ (有包車前往較方便)
設　　施：＊＊＊
教育程度：＊＊＊
遊樂指數：＊＊＊
風景指數：＊＊＊＊
可逗留時間約 60 – 90分鐘

走馬瀨農場
走馬瀨農場地方很大，綠化面積很多，空氣超好，農場內除左可即日參觀外，還有露營區及家庭住宿區，真心覺得唔錯。

來農場最主要目的，就係比小朋友餵小動物，接觸大自然，尼度比到你，由於園內面積很大，我地亦沒有時間慢慢睇住地圖hea走hea玩，問過路後，直向餵養區出發，沿路首先見到鴕鳥，但冇得餵，終於來到小動物餵養區，哥哥好興奮咁去餵山羊、乳牛等，仲好悉心咁照顧小動物，顯出左愛心的一面，細佬只係餵左一陣山羊，原來佢怕臭，好攪笑。餵完小動物，去左馬場，但係冇晒小馬，冇得騎馬，有點可惜，但亦看到很攪笑的事情，就是馬馬尿尿，嘩！原來馬馬尿尿是綠色的，唔講你都唔知。

接著沿路回起點，諗住玩鴨仔小船，在沿路中見到養蜂場，浚浚仲試食純天然無添加既蜂蜜，甜美到說不出東西，再往前走走，眼前見到既景色就深深吸引住我地既目光，真係靚到無朋友，係澳門係絕對見唔到的，一大片草源，還有裝飾的稻草屋，又謀殺了不少相片，黃昏景色加上一大片草源，真的好美。

在美景旁邊，到左吸引小朋友目光的地方，就係大範圍的遊樂設施，我的兩位公子對各樣設施愛不釋手，樂而忘返，所以立即改變行程不玩鴨仔小船，比兩位公子係度走走玩玩，童真燦爛既笑容又掛係佢地既臉上，很滿足。

走馬瀨農場
交　　通：＊＊ (有包車前往較方便)
設　　施：＊＊＊＊＊
教育程度：＊＊＊＊＊
遊樂指數：＊＊＊＊＊
風景指數：＊＊＊＊＊
可逗留時間約 2.5 – 4小時

時間過得很快，又係時候離開農莊前往第二晚既酒店了，由農莊至台南市區，約一小時車程，車內各位小朋友都累了，睡了一覺（其實大朋友應該更累，嘻嘻）。來到酒店 check in，去到8樓接待大堂，不是太豪華，似賓館一般，但房間仍算大及企理，都可接受，四人房的房間面積約300平方公尺，足夠兩位公子走走跳跳，又足夠我們執拾兩件大行李，不計較豪華美觀，是非常實用的。

愛客發商旅
地　　點：＊＊＊＊＊ (附近有7仔及全家，保證有野食)
交　　通：＊＊＊＊＊ (酒店待安排計程車服務)
乾 淨 度：＊＊＊
房內設施：＊＊＊ (一般酒店房內應有既都有)
早　　餐：＊＊＊ (雖然唔係豪華自助餐，但勝在地度，味道唔錯)

在酒店裡等細仔睡醒後，一行人分兩台計程車出發去台南最大夜市 – 花園夜市掃街及食野，去到只是覺得好大、好多人，就是因為是星期六，是特別的多人，可以用舉步難移來形容，再加上我們一行人共三個小朋友，兩部嬰兒車，行一段直路也要差不多半小時（若沒人阻礙，應該只需三四分鐘），太多人實在不適合帶小朋友前往，又要改變策略，兩位大人在出口處幫忙睇小朋友，兩位大人入夜市買食的，回酒店慢慢享用，策略成功，但少左行街既樂趣，不過不要緊，大伙人開心及小朋友安全為最重要，但真心說，花園夜市直的很大、食的很多、買的很多、價錢又平宜。

花園夜市
交　　通：＊＊＊＊＊ （但有四個出入口，分車出入的朋友要緊記同朋友夾好）
規　　模：＊＊＊＊＊
價錢指數：＊＊＊＊＊（平宜）
推　　薦：＊＊＊＊＊
可逗留時間約 2 – 3小時

12月20日（星期日） - 行程第二天
早餐在酒店享用，食物品種不多，雖然不是酒店式自助餐食物，但很有風味亦好味，早餐後，第一站前往黑橋牌香腸博物館，起初只估算是看看香腸的歷史及製造香腸既過程，但原來並不是，三層樓層可以讓我們一行人逗留了約兩小時，因為現場有很適合小朋友玩的地方，亦同時有適合大人拍照的地方，很漂亮的佈景佈置，很精美，而且係食物既博物館又點少得食同埋買呢，老實說，黑橋牌香腸博物館是一個適合大人小朋友參觀的好地方。

黑橋牌香腸博物館
交　　通：＊＊＊＊ (計程車前往)
設　　施：＊＊＊＊
教育程度：＊＊＊＊＊
遊樂指數：＊＊＊＊＊
攝影指數：＊＊＊＊
食物指數：＊＊＊＊
可逗留時間約 1 – 2小時

第二站去睇軍艦 – 德洋軍艦博物館，一個非常適合男孩子及喜歡攝影人士去的地方，可以親身踏上真的軍艦，可以近距離看軍艦內各項設備，真是大開眼界，真心覺得很宏偉，男孩子來到會份外開心、興奮，而對攝影愛好者來說，亦可以指到很美的題材照片，這裡亦是值得一去的地方。

德洋軍艦博物館
交　　通：＊＊＊＊ (計程車前往)
設　　施：＊＊＊
教育程度：＊＊＊＊
遊樂指數：＊＊＊＊
攝影指數：＊＊＊＊
可逗留時間約 0.5 – 1小時

第三站是本日的臨時後加行程，就是去德洋軍艦博物館附近的安平古堡，原計劃時沒有安排的，就是在買蝦餅時，老板娘給了免費的入場券，亦說位置在我們將去參觀的德洋軍艦博物館附近，所以臨時加了行程，其實對睇古蹟而言，亦是可以一到的地方，這裡印象最深刻是很多買的、吃的地方，尤如一個小文夜市一般，而這裡最多的店就是賣蝦片、蝦餅的店，應該是這裡的特產，我們當然有買點回去，老板娘還很客氣地入了數袋給我們當作零食，很好人，還有，在這裡要找計程車是有點難度，但又學會了，原來在台灣，部份7-11是有協助叫車服務，這個小知識是很有用的。

安平古堡
交　　通：＊＊＊ (計程車前往)
設　　施：＊＊
教育程度：＊＊＊
遊樂指數：＊＊
攝影指數：＊＊＊＊
食物指數：＊＊＊＊ (附近整條街道兩旁都是食的店舖，蝦片為主)
可逗留時間約 0.5 – 1小時

離開安平古堡回酒店，大約4點半，先讓小朋友睡一睡休息一會，小朋友睡時老婆又可以趁機SHOPPING，在酒店附近都有中型既 Shopping mall，但當然不及高雄、台北等，畢竟台南仍是較為平靜，等待小朋友睡醒梳洗好，又係出去搵食既時間，去左台南有名既度小月食東西，這是台南行程正正經經第一餐的晚餐，點了些精緻小菜，味道是可以的，價錢對澳門比較當然是便宜，但對台南生活指數比較就是較高擋的了，正正經經的食完了晚餐，去左掃左一陣街，雖然食了晚餐，但點都要買D小食才開心，就是這樣吃吃逛逛大約10點半左右回到酒店（在台南其實是沒有夜生活的，很多店很早關門了）。

度小月
交　　通：＊＊＊＊ (在我們今次住的酒店附近)
價　　錢：＊＊＊
食物指數：＊＊＊
人均消費約350-400新台幣

12月21日（星期一） - 行程第三天
早餐及 check out後，訂好的車輛剛來到酒店接我們回高雄，第一站就是去食，雖然是食的地方，但其實是非常適合小朋友的，就是主題親子餐廳，吃的、玩的、睇圖書，樣樣皆有，時間會不知不覺的很快溜走，食物的種類亦是以小朋友為主，肯定的是，小朋友一定喜歡，大人看到小朋友滿足的笑容，亦會覺得值得。

第二站原計劃前往動物園，但不幸地當天動物園關園，所以去了駁二藝術特區及哈馬星鐵道文化園區，起初聽見尼個咁有文化氣息的名字，諗住會幾悶，唔知適唔適合兩位公子睇，點知，去到現場又OK喎，駁二藝術特區內有好多藝術品，最緊要有兩兄弟喜歡既超人，都唔錯，而對攝影愛好者來說，亦可以拍到不少攝影題材，在園區內的小商店，亦有不少自家製的文化作品售賣，亦有兩位公子喜歡既雪糕，所以駁二藝術特區也是一個值得一去的地方。

駁二藝術特區
交　　通：＊＊＊＊＊ (本行程計程車前往，但附近亦有捷運)
設　　施：＊＊＊＊
教育程度：＊＊＊
遊樂指數：＊＊＊
攝影指數：＊＊＊＊＊
可逗留時間約 1 – 1.5小時

在駁二藝術特區的對面，就是哈馬星鐵道文化園區了，尼個園區更適合小朋友遊玩，在園區內有廣闊的路軌空間給小朋友走呀走，我的兩位公子當然也是其中走呀走既一份子，亦放置了不少大型藝術品，風景亦宜人，而最吸引大小朋友的地方，就是坐小型的蒸汽火車，既新奇又好玩，大小朋友定會玩的開開心心，而園區內亦有一所餐廳及購物點，價錢亦不算貴，但因較早前已在親子餐廳食飽了，無緹試試那個鐵道便當，下次有機會會嘗試一下。

哈馬星鐵道文化園區
交　　通：＊＊＊＊＊ (本行程計程車前往，但附近亦有捷運)
設　　施：＊＊＊＊
教育程度：＊＊＊＊
遊樂指數：＊＊＊＊＊
攝影指數：＊＊＊＊＊
可逗留時間約 1 – 1.5小時

參觀及遊玩完兩個園區後，又係時候回高達既酒店比小朋友休息下（大人亦可趁機會休息），今晚是留在台灣最後一晚，住好少少，住高雄麗尊酒店，一步入酒店，豪華的裝潢及服務員欣勤的服務，果然是星級酒店，舒適度及清潔度都唔錯，今晚當然亦是四人大房，住得舒適點是旅行的享受之一，入到房後先讓兩位公子小睡片刻，我就在附近便利店買點食的，老婆大人去新堀江商圈走一轉，梗有收獲的呢，我冇出去SHOPPING都有份，多謝老婆大人！

麗尊酒店
地　　點：＊＊＊＊ (附近有7仔及全家，酒店樓下有食店)
交　　通：＊＊＊＊ (酒店待安排計程車服務)
乾 淨 度：＊＊＊＊＊
房內設施：＊＊＊＊＊
早　　餐：＊＊＊＊ (品種不少的自助餐，味道唔錯)

到兩位公子睡醒後，一行人兩台計程車七點多出發去夢時代，又係一個可以玩、買、吃的好地方，一抵達夢時代，第一步即到頂層遊樂場，當然我地一行人每人都以小朋友為中心，所以行程首要考慮梗係以小朋友為先，去到頂層，即見到細仔最喜歡既摩天輪，立即買票乘坐，真係好開心，在摩天輪上又可欣賞高雄晚間風景，細仔就坐定定好專心地慢慢享受坐摩天輪，大約坐15-20分鐘轉了一圈，出來玩了一陣場內其他遊樂設施，各位小朋友都玩得樂而忘返，好開心。

睇睇手錶，不經不覺原來九點多了，怪不得咁肚餓，決定落回夢時代搵食店醫肚，慘了，很多食店已暫停接客，冇野食點算，不過在台灣是不需害怕尼個問題，我地決定搭計程車回酒店附近買食的，我地選了酒店旁食店買外賣上房食，價錢非常合理、味道又好，我地一家四口食到好滿足。

12月22日（星期二） - 行程最後一天
早餐及 check out後，攜帶著行李再蹲夢時代（因為我地下午四點幾機，夢時代是一個適合既選點），再次到達夢時代，先張行李寄存，繼續去玩、買、食，在比小朋友去玩一玩前，昨晚發現夢時代有間30分鐘配眼鏡的店，價錢又便宜，僅在澳門配眼鏡的1/5 – 1/8價錢，咁我地有近視既團友又點會放過機會，我都配左兩副（其中一幅係藍光鏡片），折合葡幣一仟一佰幾，仲有得退稅，真心覺得超值。

配完眼鏡後，當然又到小朋友開開心心既時間，除左頂層露天遊樂場外，還去了八樓室內遊樂場玩，一切都要盡興最緊要，係遊樂場既時間係大朋友小朋友既開心時刻。遊玩完，當然又是醫肚時間，選左間日本餐廳，最適合大家慢慢享用豐富既午餐，係高雄食野真係又便宜、又好食，洗錢都洗得份外開心，在午餐後，兩家人分開在商場內行左一陣，大約三點集合出發去機場，開開心心忙忙碌碌既四天行程就係咁完結了。

夢時代
交　　通：＊＊＊＊＊ (本行程計程車前往，但附近亦有捷運)
設　　施：＊＊＊＊＊
購物指數：＊＊＊＊＊
遊樂指數：＊＊＊＊＊
飲食指數：＊＊＊＊＊
可逗留時間約 3 – 6小時

~~~ 完 ~~~