7月29日 (星期三)
日出喇，起身喇，第一時間去打開窗簾出露台望望，感覺好好，住在澳門走出露台絕對係兩回事。
梳洗好，去嘆個海景早餐，食物種類及質素（評 ＊＊＊＊），都係西式及日式為主，岩晒我口味，杯咖啡都唔錯。
早餐後，出車出發，尼站就係海洋館，由酒店至海洋館車程大約30分鐘。
海洋博物館, 沖繩縣本部町石川424 ,Tel: 98-048-3748 http://www.oki-churaumi.jp （親子好去處推介評分 ＊＊＊＊＊）
抵達海洋館，都係好好天，好晒好熱，但海洋館設施唔錯，沿路會有霧化水氣噴出，倍感清涼。
持票入場（註：唔好在現場買票，貴D，其實海灘酒店及沿途的便利店都有特價票賣），開始參觀，海洋館兩兄弟最岩，哥哥一向對海洋生物存有濃厚興趣，細佬亦對此有好奇，藉此培養興趣，GOOD。
去到大水族缸，鯨鯊好大好大，係你面前游過時好震撼（長隆海洋鯨鯊較多，但體積細好多），仲有唔同既海洋魚類，在冷氣環境下，都睇左差唔多25-30分鐘。
去到鯊魚區，可以睇鯊魚之餘，在活動教學中學到好多野，值得推介。
在館內逗留左大約個半小時，細佬眼瞓，嫲嫲又有D攰，在博物館休息區前嫲嫲睇住細佬瞓下覺，我地就去左海豚館附近買午餐，天氣太熱，胃口唔係咁好，雜糧為主，食物味道都唔錯，評 ＊＊＊＊。
 |
| 細佬瞓到好甜美 |
食完野，細佬仲瞓緊，帶哥哥行埋個博物館，面積雖然細，但內容都豐富，咁都可以睇左約40分鐘，哥哥對裡面既展品有濃厚興趣，不停問同埋細心欣賞，GOOD。
睇完博物館，去左睇海中美人魚 – 海牛（海牛唔係魚類，屬哺乳類），第一次見真的海牛，幾得意，仲係館外影兩張靚相。
嘩！細佬好瞓得，仲未起身，決定走人，原定去菠蘿園同埋去下古宇利島睇下影下相（位於沖繩北方，島嶼本身並不大，開車十幾分鐘就能繞一圈了），但臨時改變左，回酒店落沙灘玩水，唔好浪費美麗既海景及沙灘酒店，今次去唔到既地方，下次再去。
玩水玩到6點幾，好盡興，水好清涼，浪又唔太勁，好好玩，兩兄弟樂而忘返，但緊記沙灘既沙好粗，基本上大部份是珊瑚骨，都幾刺腳，小心。
玩完水，返房沖涼，落酒店食野，食野前行去附近便利店買左煙花，等飯後玩，今次晚餐冇影相，太肚餓，食物又好食，食物種類及質素（評 ＊＊＊＊＊），好滿足。
第三日又開心愉快地完成。
沒有留言:
張貼留言